اکثره عرب واکمنان د بهرني قوتونو په ملاتړ واک ته رسېدلي دي

عجیبه خو لا دا ده چې د عربو ملتونه تر اوسه د خپلو پردي‌پالو، لاسپوڅو واکمنانو اصلي څېره او د دوی کړنې نه دي  پېژندلې. هغوی لا هم له دغو حاکمانو داسې تمې لري، چې نه یوازې له واقعیتونو لرې دي، بلکې د دوی د ویرجن تاریخي حالت انعکاس کوي.

‏اکثره عرب واکمنان د بهرني قوتونو په ملاتړ واک ته رسېدلي دي. یا یې کودتاوې کړي، یا یې په ټاکنو کې درغلي کړې، یا یې د دین، قبیلې او ملي هویت په نوم ولسونه غولولي. خو ملتونه بیا، د تاریخي ماتې، اقتصادي سقوط او فرهنګي نشتوالي له امله، لا هم د بیدارۍ له هغه پړاو نه دي تېر شوي چې خپل حقیقي دښمن وپېژني.

‏له بده مرغه مصر نه تر سعودي، له اردن تر تونس، ملتونه یا په چپتیا کې دي، یا د درواغجنو هیلو تر بوج لاندې د غلامۍ ژوند کوي. د واکمنو پر وړاندې د ملتونو بنسټیز سیاسي پوهاوي نشتوالی له کبله ، ملتونه بې واکه او بې‌ اختیاره کړي دي؛ نه یې انقلاب بریالی کېږي، نه یې اصلاحات ثمره ورکوي. دا ځکه چې د دوی نظامونه مصنوعي دي، تصمیمونه يې وارداتي دي، او مشروعیت یې د زور، د پردي‌پالو دیني مفتیانو د فتویو او بهرني تایید پر مټ تأمینېږي.

‏دلته پوښتنه دا ده چې: آیا اسلامي امت کولی شي له دې حالت څخه ووځي؟ آیا د بیدارۍ، ازادۍ او یووالي کوم اساس شته؟ 
‏البته دلته د مقاومت مفکوره منځ ته راځي، یو داسې مقاومت چې یوازې فزیکي نه وي، بلکې فکري، سیاسي، اقتصادي او تمدني بڼه ولري.

‏د اسلامي امت یووالی، د واکمنو تر شعاري غونډو، تشو اعلامیو او د درباري ملایانو د فتوو ور هاخوا، یو ژور تمدني مسؤلیت دی. دا یووالی یوازې هغه مهال ممکن دی، چې ملتونه خپل اساسي هویت ته را وګرځي، د اسلامي عدالت، خپلواک تصمیم‌نیونې، او د استعمار پر ضد د واضح دریځ پر بنسټ عمل وکړي.

‏د مقاومت فرضیه همدی ته وايې: که امت غواړي خپل حیثیت، خپل تقدیر او خپل ثبات بېرته ترلاسه کړي، نو باید د فکري غلامۍ، اقتصادي انحصار، او سیاسي پردي‌توب پر وړاندې ودریږي. دا مقاومت باید له دروغجنو، دربارپالو ملايانو، خاینو حاکمانو او هغو نړيوالو نظامونو پر وړاندی ترسره شي، چې د اسلامي نړۍ وینه یې ارزانه کړې ده.

‏که عرب ملتونه په خپل کور کې د ننه حقیقي دښمن، “استعمار” و نه پېژني، نو دا تمې به تل له درده ډکې وي، او دا هیله به تل له فریب او نمابشي شعارونو جوړه وي.
‏که نه، نو دا امت به د شعارونو، او دروغجنو نمایشي کنفرانسونو تر سیوري لاندې، تل د ذلت، غلامۍ، ماتې او استعمار قرباني پاتې شي.