شیطاني رسنۍ او د دوی فکري اربابان دا توان لري چې د افغاني ټولنې روحیه له منځه یوسي

فکري یرغل تر اوسه په افغاني ټولنه کې د مغرضو شيطاني رسنیو، کرايي ژورنالېستانو، او پردي‌پالو لیکوالانو له لارې په مستقیم او هدفمند ډول پرمخ وړل کېږي.

‏متأسفانه افغانان په دې وروستیو کې له داسې شيطاني رسنیو، ژورنالېستانو او پردي پالو درباري لیکوالو سره مخ دي چې نه د ملي ګټو استازیتوب کوي، نه د حقیقي څېړنې ظرفیت لري، او نه هم د ملت د یووالي لپاره کوم مثبت پیغام لري. دا هغه کسان دي چې یا د پردیو له خوا تمویلېږي، یا هم له داخلي عقدو او سیاسي تمایلاتو سره د ملت پر وړاندې دښمني پالي. د دوی هڅه دا ده چې یوه ملي، سیاسي یا ټولنیزه موضوع راواخلي او بیا یې د خپلو تحلیلونو او جعلي تعبیرونو له لارې زهرجن منفي انعکاس ورکړي.

‏د دوی تر ټولو خطرناک کار دا دی چې د ملت مشرانو خبرې تحریف کړي، د هغوی ملي ستراتیژیک لیدلوري جنجالي کړي، او دا هر څه د ټولنیزو شبکو له لارې د خلکو ترمنځ خپروي، څو د شک، تفرقي، او بدبینۍ فضا جوړه کړي. دا کړنلاره نه یوازې د فکري اشغال یوه بڼه ده، بلکې د ملت پر ضد یوه مستقیمه تبلیغاتي جګړه ده.

‏په ځانګړي ډول د حکمتیار صیب ملي او سیاسي دریځونه، چې د ملي یووالي، اسلامي امت ارزښتونو، او سیاسي ثبات لپاره وړاندې شوي، تل د دغو کړیو تر حملو لاندې وي. دوی هڅه کوي دا تحلیلونه تخریب کړي، له اصلي بڼې یې واړوي، او د ځوان نسل ذهنونه مغشوش کړي.

‏خو دا کسان باید پوه شي چې ملت نور د دوی نه سخته کرکه لري او نه ورته د باور وړ دي، ولسونو حقیقتونه يې درک کړي، او د شومو پروپاګندونو پر وړاندې د خپل تاریخ، ارزښتونو، او رهبرانو دفاع ښه په جرائت کولی شي. نه دا ډول کرايي لیکوالان، نه شیطاني رسنۍ، او نه هم د دوی فکري اربابان دا توان لري چې د افغاني ټولنې روحیه له منځه یوسي. د دوی ځای د ملت په زړونو کې نه، بلکې د تاریخي خیانتونو په پاڼو کې محفوظ دی.