يوه ريښتينې کيسه؛ فيسبوکي مينان
« ماري » ته خدای تعالی ښایسته قواره ورکړې وه ، غټې ، غټې بڼورې سترګې ، طلايي وېښتان ، نرۍ شونډې ، سورايي غاړه او دنګه نرۍ پوزه يې وه ؛ ځکه خو به يې چې پر ، پروفايل انځورونه خپاره کړل ، په زرګونو لايکونو به ونمانځل شوه ... چا به يوه يوه د ګلو ډالۍ ترې نثار کړه ، چا به د مينې کلمات ور وړاندې کړل ، او چا به يې په مينه کې بلا لفظونه غېږ په غېږ کړل ...
« شمو » يې هم د فيسبوک ملګری ؤ ، چې په لايکونو سربېره به يې هغې ته بې کچه مينه ور کوله ، کله کله به يې د ګلونو له رنګينې غُنچې سره خپل انځور هم ور واستاؤ ...
- ډېره ښکلې يې
- ښایسته ځواني دې ده
- د قاف ښاپېرۍ يې
او نورې داسې مينه ناکې جملې به يې ورسره يو ځای کړې چې
« ماري » پرې خوشاله شي .
« شمو » هم ښایسته ځوان ؤ ، ښکلې ځواني يې لرله ، له رنګه غنم رنګی ؤ ؛ او خدا دادي ښکلا يې د چا توجه جلبولی شوه ، انګليسي يې هم ياده وه ؛ ځکه خو پر « ماري » ښه لګېده آن تردې چې فيسبوکي ملګرتيا يې په سوکه سوکه د مينې نازکې رشتې ته لاړه ، « ماري » به د هغه د پام وراړولو لپاره نوي ، نوي سټايلي انځورونه خپرول ، کله په تنګ پتلون کې ، کله په منې ژوب ، کله له ماکسي جامو سره ، او کله د باليووډ فلميانو په بڼه ، « شمو » به يې پر کتو لايکونو ته کش ورکړ ، د ګلو ګېډۍ به يې ورسره غبرګې کړې ، لاچې د زړه بوخڅه به يې هم ور ته خلاصه کړه ...
يوه ورځ « ماري » ډېر لوکس انځور پروفايل ته جګ کړ ، پر وېښتانو يې نوی سټايل کړی ؤ ، څه يې د کامرې کمال هم ورسره يو ځای کړی ؤ او د پخوا په پرتله يې ښايست دوه برابره نور هم زيات شوی ؤ ، هومره چې د « شمو » زړه ورته نری نری شو !!
پر لايکونو او نورو فيسبوکي ډاليو سر بېره يې د عاشقانه مزي د عملي تصوير يوه رنګينه تمنا پر زړه ورتانده شوه ؛
- راځه ماري ته د خپلې مينې انداز وښيه ، خپله بوخڅه ورته خلاصه کړه ، د مينې وروستۍ پاڼه ورته را واړوه ...
ميسنجر يې پرانيست ، په انګليسي يې څو ټکي سره يو ځای کړل ؛
- ماري سبا په خير ! غواړم خواله درسره وکړم ؛ آيا کولی شې څو خبرې راسره خوله په خوله کړې ؟
درنښت
ستاسې شمو.
څو شېبې وروسته ټنننګ ويډيو کال راغی ..
- ګوډ مارنينګ شمو !
- هٓو آر يو؟
بيا يې ورسره ځوابيه ټکي غبرګ کړل ؛
- هو هو ولي نه ، مهرباني وکړئ
شمو يوه سړه سا وايسته ، په زړه يې ګوړې ماتې کړې ، تر لږ فکر وروسته يې ورته و ويل :
- ماري جان ! زه ستا په مينه کې ښکېل يم ، که ريښتيا را باندې وايې ؛ در باندې مين يم ، آيا کولی شې راسره واده وکړې ؟
ماري له ځان سره وموسېده ، پر نريو شونډو يې مُسکا تېر و بېره شوه ، ور غبرګه يې کړه :
« زما واده به له هغه چا سره کېږي چې زما په شرايطو برابر وي ، ښایسته اندام ولري ، لوړې زده کړې يې کړې وي ، په انګليسي مسلط وي ، د انګلستان قوانين ومني ، او زما هرې غوښتنې ته
« هو » ووايي ... »
شمو ته د هغې په شرايطو سربېره دا خبره ډېره په زړه پورې وه چې ماري انګلستانۍ را وخته ، په زړه يې دا هيلې هم ور وټوکېدې چې ګوندې د انګلستان مزو چړچو ته يې ورسوي ...
ور غبرګه يې کړه :
« زه خو د خپلې ځواني صفت نه کوم ، له انځور نه مې وکسه ؛ انګليسي مې زده ، ده ، لوړې زده کړې مې هم کړې ، او که د انګلستان د هستوګني موکه راته برابره شي ؛ قوانين به يې خامخا منم ...»
له همدې سره يې څلور پنځه قطعې انځورونه هم ضميمه ور واستول ...
ماري نور ځواب ور نه کړ ، بلې غوښتنې او ځواب ته يې په پلان کېناسته ؛
-څه به کوي ؟
- څنګه به يې راغواړي ؟
- او کوم کوم تدابير به په کار اچوي ...
شمو يو ځل بيا يو پيغام ور واستاؤ ؛
- ماري جان ستا ځواب رانغی !
- زه ستا په تمه ناست يم ...
ماري دا ځل يوه نوې غوښتنه وکړه ؛
- زه بايد ډاډه شم چې ته روغ يې ؛ ځکه خو اړينه ده چې ما له خپل صحت نه ډاډمنه کړې...
شمو له طبيبانو د خپل صحت تصديقونه ور پارسل کړل ، ورته ليکلي يې ؤ ؛ سړی رک روغ دی.
ماري ورته وويل ؛ زه چې له تاسره واده کوم ؛ نو انګلستان ته به دې را غواړم ؛ په تا باندې به لګښت کوم ؛ زه بايد ستا له هر اندام نه اطمئنان حاصل کړم ، لطفاً يوې خونې ته لاړ شه ، ور درپسې بند کړه ، او د لوڅ بدن داسې ويډيو را واستوه چې هم دې ټول غړي پکې وښکاري او هم
غړي پکې وښکاري او هم دې د مينه ناکو حرکاتو څرنګوالی معلوم شي.
ماري له دې غوښتنې سره خپل بربنډ ويډيويي انځورونه ور واستول ...
دمېړه او ښځې تر منځ د اړيکو څرنګوالی څنګه وي ؛
د خواهشاتو اشباع له کوم ځايه پيلېږي ؛
په مينه کې کوم ، کوم کارونه اړين دي ؛
او ...
شمو د ماري ويډيو ګانې بيا بيا وکتلې ، هر څه يې ترې کاپي کړل ...
داسې بايد وکړم
هاسې بايد وکړم
دا هر څه يې په وار وار له ځان سره تمرين کړل ، بيا يې په يوه خونه کې په بربنډه بڼه خپل تمرينات ټول ويډيويي کړل او ماري ته يې ور سنټ کړل !!
ډاډه ؤ چې هغه به يې خوښ او د واده لاره به يې لنډه کړي !!
ماري ځينې نور بر بنډ انځورونه هم ور و لېږل او شمو يې د ورته حرکاتو ويډيو ګانو ته وهڅاؤ ، او ډاډ يې ور کړ چې د دواړو ترمنځ د واده مزی په غوټه کېدو دی !
شمو د هغې پر ډاډېينه خوښ شو ، د انګلستان شنو او سرو څراغونو يې د سترګو کسيو ته ځلکونه وهل ؛ ځکه خويې د لوڅو ويډيو ګانو په برابرولو کې له هغې نه هيڅ هم ونه سپمول !
درې ورځې لا نه وې تېرې چې ماري ورته زنګ وواهه ؛
- لس زره ډالر را لېږې ، که دې ويډيو ګانې خپرې کړم !؟
- اوه ! دا څه وشول ، دا په څه بلا وا وښتم ، ما خو ددې ډول بدنامۍ تصور هم نه ؤ کړی !!
خوله يې جينکه کړه ؛
- ماري جان ! دا کار مه کوه !
- هيله کوم ما مه رسوا کوه !
- ډالر نه لرم ، غریب سړی يم !
خو « ماري » د ډالرو د حصول په پاټک ناسته وه ؛
- يا به ډالر راکوې ، یا دې ويډيو ګانې .... !!
شمو ددې ډول سناريو په عواقبو نه پوهېده ؛ فکر يې وکړ چې څه به نه واقع کېږي ؛ ځکه خو د انکار په دريځ کلک ودرېد ؛ ماري ته يې ځواب ورکړ ؛
- لاس دې خلاص ، هرڅه چې کوې ويې کړه ...
يوه اونۍ لانه وه تېره سوې چې شمو د خپل شخصيت مړی د فيسبوک پر بازار حلال ، حلال وموند .
تبصره / نظر
نظرات / تبصري
د همدې برخي څخه
شریک کړئ
زمونږ فيسبوک
