پر کور ناسته بې علمه ښځه

زه غواړم هغو خطرونو ته اشاره وکړم په خپل دغه مقاله کي چي یوه ښځه څنګه د دنیا د دچټګ پرمختګ سره تغییر مومي ، او څنګه د دې د ناپوهۍ آثار پر کورنۍ ، او ټولني ولیږي.

پام کوه چي ته داسي فکر ونکړې چي زه غواړم ښځي د کورونو څخه وباسم ، یا د ښځو ازادي د شریعت د چوکاټ څخه دباندي وغواړم .

زه خپل مقاله د یو انځور په شکل تاته وړاندي کوم .

حبیبه یوه ماشومه انجلۍ ده ، په یوې داسي کورنۍ کي زېږدلې چي هلته د علم هیڅ څرک نسته ، پلار یې د کور څخه بهر د رزق ګټلو په لټه کي دی ، وړونه یې ځیني مهاجر دي ، ځیني د خپل کور جوړولو په فکر کي شپې سبا کوي.

د حبیبې مور هم بې علمه ده ، د دې دکورنۍ ټولي ښځي بې علمه دي ، په کلي کې ټولي انجوني ښوونځۍ او مدرسې ته نه ځي چي په دې سره یو ډول د ناپوهۍ فضا خپره ده د دې په چاپیریال کي .

د دې زړه درسونه غواړي خو زمینه نه ورته برابریږي ، د کلي ټولي انجوني په شوق غًواړي چي ډاکټراني یا معلماني سي خو څوک ورته زمینه نه برابروي .

حبیبه خپل راتلونکې ته ډېره خپه ده ، د کلي انجوني هم د دې په څېر د ژور خپګان ښکار دي ، ځکه ټولي بې علمه پاته سوې .

حبیبه په دې خپګان کي شپې سبا کوي ، د پلار سره چي کښیني هغه هم د دې زده کړو او راتلونکي ته مایوسه یې ، دوی تل په خپل کور کي دا د مایوسۍ خبري کوي ، د وخت په تېردو سره د حبیبې په زړه کي عقده پیداکیږي ، د کلي نوري انجوني یې هم د دې په څېر عقده لري د هغه چاسره چي دوی ته د زده کړو زمینه نه برابروي .

حبیبه د دې پرمختللي نړۍ هر ډول امکاناتو ته لاس رسی لري ، ټلویزون کتلی سي ، ډش ته لاس رسی لري ، ځیرک مبایل خو دا له وخته د ځان سره ګرځوي ، په مبایل کي ټولنیزو شبکو ته لاس رسۍ لري ، دا که وغواړي د هرچا سره په ډېر عادي شکل اړیکه ټینکولی سي

د ټلویزون او ډش پر مخ هر ډول سریالونه کتلی سي ، آن تر دې چي دا بد اخلاقه فلمونه هم کتلی سي ، د نامحرمو سره اړیکه په عادي توګه ساتلی سي.

دا چي حبیبه بې علمه ده ناپوه ده ځکه غلطیږي ، د شهوت وږي کسان یې غولوي ، پر ټلویزون هیڅ اسلامي برنامې نسته، که سته ټول سریال او فلم دی چي د دې اخلاق او کردار په خپله خراپوي ، چاپیریال یې هم بې علمه دی ، هلته نور پردي کسان غواړي دا خپل د سیاست لپاره وکاروي ، دا ډېر ژر د پردو د لاس آله سي د هغوی د مصلحت او ګټلو لپاره کار کوي .

حبیبه یوه ساده انجلۍ ده ، عاقله ده خو ناپوه ده ، د وطن په ګټو نه پوهیږي ځکه دا ښوونځۍ ته نه ځي چي هلته یې فکر جوړ سي ، په دین هم نا خبره ده ځکه د دې خپل لمونځ هم ندی زده ، د حلال او حرام تر منځ پوهاوی نلري .

نړۍ په خورا جذابه طریقه د دې اخلاق د فلم ، سوشل میډیا له لاري خرابوي، او دې ته یې د انټرنټ په مټ زده کړي برابري کړي ، د میاشتي یوه اندازه نغد مبلغ پیسې هم ورکول کیږي تر څو دا ډېره تشویق سي ، دا په آن لین توګه ځیني صنفونه ورسره اخلي ، استاذان یې د دین او هیواد پر خلاف روزي ، په ډېره جذبه د دې فکر دا دا مفکوره انتقتلوي چي ته مظلومه یې حق دي خوړل کیږي ، پر تا ظلم کیږي ، ټولنیز بندیزونه دي درباندي ، دین ستا دفاع نکوي بلکي برعکس ته د دین په نوم ځپل کېږې .

دلته د حبیبې عقده نوره هم زیاتیږي ، دا اوس دوه اختیاره لري یا خو ځي هیواد پرېږدي ، یا د دغې عقدې سره ودیږي د بل کور ته ، هلته هم چاپیریال ټول بې علمه دی ، په نوي کور او نوي ژوند کي د دې ژوند نور سختیږي .

اوس د واده وروسته دا نور بچیان زېږوي ، دا چي ماشوم ژر انعاکس اخلي نو دا خپل د ژوند دا ترخې خاطرې هر وخت ورسره شریکوي ، په همدې تسلسل د دې بچیان هم عقده من جوړیږي .

اوس حبیبې وکولی سوه چي مکمله کورنۍ او خپل اولادونه تغیر کړي ، فکري بدلون ورکړي ، عقدمن یې را لوی کړي داچي حبیبه د دین څخه لیري وه فاصله یې اخیستې وه ، اوس دا اجازه نه ورکوي چي د دې بچیان دي دینداره رالوی سي ، د وطن د میني او ګټو په اړه خو اصلا دوی نه پوهیږي .

په همدې تسلسل حبیبې یوه کورنۍ عقدمنه جوړه کړل ، د حبیبیې تر څنګ نوري دې ته ورته انجوني هم عقدمني دي هغوی خپل کورنۍ داسي تربیه کوي چي په نتیجه کي یوه مکمله ټولنه هم د دین خلاف تربیه کیږي ، او هم د وطن د ګټو پر خلاف لوبيږي ، دوی په ډیري اسانۍ سره د نورو د لاس آله جوړېدلی سي ، دوی د سالمي ټولني د جوړولو په مخنوي کي رول لرلی سي ، دوی د دین خلاف خپل مبارزه په دوامداره توګه ساتلی سي آن تر دې چي دوی نظام او حکومتونه هم ننګولی سي ، دا ځکه چي زوړ نسل ختمیږي ، نوی نسل نظام ننوځي په مرور د زمان خپله نظام او ټولنه تهدید کولی سي ، ځکه حبیبه یوه ښځه ده ، د ټولني نیمه برخه تشکلوي دا په یوه حالت کي مور، خور ، عمه ، خاله ده او تاثیر یې پر خپلوانو ډېر زیات دی ځکه خو دا د فکر په بدلون کي تر هرچا ښه رول لوبولی سي.

اوس حبیبه ولي له دین لیري سوه ؟ ولې بد اخلاقه سوه ؟ ولي د وطن د ګټو پر خلاف سوه ؟ ولي یې عقده واخیستل ؟ ولې د پردو لپاره کار کوي ؟ ولي یې خپل کلتور ونه ساتی ؟ او بالآخره ولي دې هیواد پرېښودی او د هغه ځای څخه یې د نورو انجونو د جلبولو مبارزه پیل کړه ؟ ولې د دین او هیواد خلاف سوه ؟ ولې د نظام لپاره تهدید سوه؟

د دې ډېر لنډ جواب دا دی چي دا زده کړو ته چا نده پرې ایښي ، بې علمه وه ، که دا چیري زده کړو ته تللی نو هلته به د دې فکر جوړ سوی وای ، ځکه تعلمي مرکزونه ، نصاب ، معلم  د ژوند او فکر جوړلو تر ټولو مؤثر اسباب دي

نړۍ خو هوښیاره ده ، پوهیږي چي جهل څنګه ټارګیټ کړي ځکه خو اوس خلکو د دې خلا څخه استفاده وکړل ، او حبیبه یې  د خپلو سیاسي ګټو لپاره وکارول ، چي په پای کي هم د دین خلاف سوه او هم د نظام .