ژمنه
دا وطن مې کړ ودان ، ودان مې نه کړ؟
لکه څنګه چې ښه وران و، وران مې نه کړ؟
زما هر پلان کې لویه فلسفه ده !
درته ومې کړ اعلان ، اعلان مې نه کړ؟
د رنځور ولس همدومره سزا بس ده
په سوران و په سوران ، سوران مې نه کړ؟
د خپل واک د غرور اس نه کله کوز شوم ؟
په سلګو سلګو روان ، روان مې نه کړ؟
عقل څه دی ؟ د ساده وو غولول دي
ما خپل ځان پر تا تاوان ، تاوان مې نه کړ ؟
دا ملت مې د خدمت دی پوروړی
تر نادانه هم نادان ، نادان مې نه کړ؟
د نوي سلنه خلکو ژوندون ګوره !
په غربت کې چې روان و، خان مې نه کړ ؟
نوره څومره ارزاني کړمه نازله ؟
د انسان ژوند چې و ګران ، ارزان مې نه کړ ؟
چا ویل چې دروغ پر غره باندې ختل دي ؟
هر یو کار چې به و ګران ، اسان مې نه کړ ؟
پس له ما به څوک د فکر نوم وا نخلي
ما د پوزې کړ پېزوان ، پېزوان مې نه کړ ؟
هر سړی پوهېږي خپله مشغولا یې
له اوله دا بیان ، بیان مې نه کړ ؟
چا ویل چې له کابله بېروت جوړ کړه !
له پخوا نه و لبنان ، لبنان مې نه کړ ؟
دروغ ویل ، قسم خوړل دي؛ سیاست څه دی؟
تاسو وې چې دی ډېران ، ډېران مې نه کړ ؟
تبصره / نظر
نظرات / تبصري
د همدې برخي څخه
شریک کړئ
زمونږ فيسبوک
