زمونږ فکري او سیاسي تګلاره؛ د افغانستان په اړه متوازن، عادلانه او مسؤلانه لید

زمون د یوه ژمن مسلمان، د علمي او پوهنتوني ټولنې غړي، د اسلامي فکر او نهضت لاروي، او د یوه ملت‌پال سیاسي فعال په توګه، د افغانستان د قضیو تحلیل هېڅکله د ډلې، قوم، یا جناح ته تعصب نه کوم، بلکې دا مسایل زه د انصاف، واقع‌بینۍ، اسلامي ارزښتونو او د خلکو د خیر او صلاح له لیدلوري ګورم.

زما لیدلوری او موقف په تېرو څلورو لسیزو کې په یوه جمله کې رانغښتل شوی دی:
???? "نه هر څه تور دي، نه هر څه سپین؛ واقعیتونه مختلف رنګونه لري، چې باید د دقیق، عادلانه او عاقلانه لید له مخې وارزول شي."

زه داسې فکر کوم او عمل کوم چې:
✅ ۱. د حق پالنه د ډلې‌ پالنې نه لوړه ده
زما په باور، هر اقدام چې د خلکو د خیر، د هیواد د ودې، د ثبات پیاوړتیا، عدالت، خپلواکۍ، ملي حاکمیت، ملي یووالي، وروڼووالي او عامه امنیت لامل شي – پرته له دې چې دا د سرپرست حکومت، اپوزیسیون، یا کومې خپلواکې ادارې لخوا تر سره کېږي – باید ملاتړ یې وشي.
او پرعکس، هره پالیسي، کړنه یا دریځ چې د اسلامي ارزښتونو، ملي ګټو او د افغان ولس له حقوقو سره ټکر ولري، باید په جرئت، ادب او د ولس‌پالنې له احساس سره نقد شي.
✅ ۲. تفاهم او اصلاحات باید د جګړې او حذفی سیاست بدیل وي
زه باور لرم چې افغانستان به د زور، تاوتریخوالي، تحقیر، انحصار، حذف او انتقام له لارې آرامۍ ته نه رسېږي.
د دې ملت ژغورنه د تېرو تجربو نه په زده کړه، ملي تفاهم، اصلاحاتو، ټول‌ګډونه مشارکت، د قانون حاکمیت، د منطق او ملت‌پالې اجماع په بڼه شونی دی.
✅ ۳. متوازن دریځ؛ نه تعصب، نه کرکه
زما دریځونه د علمي تحلیل، د دیني وجدان، او ملي درد پر بنسټ ولاړ دي؛ نه د کوم قدرت سره تړاو لرم او نه له کومې ډلې سره شخصي دښمني.
که چیرې د طالبانو کوم عمل یا موقف د ملت، اسلام یا وطن له نظره مثبت وي، زه یې په صراحت سره ستایم.
خو که کومه پالیسي یا عمل یې د اسلامي اصولو، د خلکو له حقوقو او د ملي منافعو سره په ټکر کې وي، زه یې په وضاحت او بې له وېرې نقد کوم.
تمجید، تابعیت نه دی؛ نقد، دښمني نه ده. دا تفکیک باید فرهنګ شي.
✅ ۴. د تخریبي بریدونو باوجود، له مسؤلانه دریځه نه شاتګ نه کوم
په اوسنۍ سیاست‌ وهلی فضا کې، که د طالبانو یوه مثبت ګام تایید کړم، «طالباني» بلل کېږم؛
که یې یوه تېروتنه نقد کړم، «دین ضد» یا «د غرب پلوی» خطابېږم.
زه د دې توندلارو فشارونو پر وړاندې، د زغم او صبر لاره نیسم، ځکه باور لرم:
???? "د یوه فکري مبارز او مسؤل سیاستوال وظیفه د جناحونو خوښول نه دي، بلکې د حق ویلو او د ولس لارښوونه ده."
✅ ۵. اسلام او ملي ګټې زما د لارې څراغونه دي
زما دریځونه د شخصي ګټو، قومي تمایلاتو، یا مقام غوښتنې پر بنسټ نه دي، بلکې د اسلامي ارزښتونو (عدالت، شورا، اصلاح، نصیحت، قانون‌پالنه، ګډ ژوند، دعوت، له منکر نه منع) او د افغانستان د خلکو د خیر پر اساس ولاړ دي.
د همدې لپاره زه:
د جګړې  او تاوتریخوالی پر ځای د خبرو اترو غوښتونکی یم؛
په تدریجي، سوله‌ییزو اصلاحاتو باور لرم؛
د خلکو پر واقعي مشارکت باورمند یم؛
او ظلم، انحصار، تحمیل، حذف، احتکار او د قومونو، مېرمنو، علماوو او نخبګانو تحقیر غندم.
???? په پای کې، دا خبره په صراحت سره کوم:
زه نه د طالبانو استازی یم، نه د هغوی د مخالفینو ویاند.
زه د یو آزاد، مستقل، عادلانه، اصلاح‌غوښتونکي او د ولس درد حس کوونکي تفکر استازیتوب کوم.
زه د داسې راتلونکي هیله‌مند یم چې: افغانستان د ټولو افغانانو ګډ کور وي، چیرې چې خلک د توپک پر ځای د تفاهم له لارې، د ورورولۍ، برابرۍ، قانون‌محور عقلانیت او احترام فضا کې ژوند وکړي؛ نه د تعصب او افراط او تفریط له مخې.
الحمد لله، د لوی خدای شکر دی چې موږ پدې فکر، دریځ او لاره کې یواځې نه یو. د افغانستان زرګونو مخلص او با رسالته زامن ،نارینه  گاو ښځینه، زاړه اوځوانان ،  علماء،پوهان،استادان،علمی او‌متخصص کدرونه، مخور او ملی شخصیتونه، د اسلامی فکر او نهضت لارویان،  د هېواد له هرې سیمې، قوم او مذهب څخه، دا متوازن، معتدل او د خیر غوښتنې لیدلوری او دریځ د خپل ګران وطن او د هغې د قضیو په اړه لري.
او زه به، إن شاءالله، تر خپله وسه پر همدې لاره ولاړ یم.

????
حسبنا الله و نعم الوکیل

#افغانستان
#عادلانه_دریځ
#ملي_تګلاره
#اصلاحات
#تفاهم
#اسلام_او_ملي_ګټې
#نه_افراط_نه_تفریط
#روڼ_راتلونکی