د حزب اسلامي او طالبانو صلحه؛ حق څه دئ او دروغجنو څنګه د جعل په پردو پوښلی

مستیار

لمړی قسط

عجیبه ده چي طالبان تر حزب اسلامي ځان پدې منطق او دلیل غوره بولي او حکومت د ځان حقیقي او موروثي حق ګڼي چي دوی د جهاد او قتال په نتیجه کي پر کابل مسلط شوي او د چارو واګي ئې په زور او تغلب لاسته راوړي،په ډېر وقاحت او سپین سترګي سره په واز کومي  وايي: حزب اسلامي تسلیم شوی حزب دئ،حکمتیار د هیواد په داخل کي په داسي حال کي را څرګند شو چي ټول افغانستان د امریکایانو تر سلطې او ولکې لاندي وو؛ دا پداسي حال کي چي حقیقت سل په سلو کي د دې خلاف واقع دئ،د طالبانو صلحه له ناټو او امریکا سره په څه ډول وه،ددې صلحي حقیقت او شرعي حیثیت څنګه دئ،کوم بندونه ئې ښکاره او د اولس په وړاندي اوکوم ئې مرموز دي،ولي دا توافقنامه له هیواد بهر لاسلیک شوه پداسي حال کي چي دا په افغان اولس پوري مربوطه قضیه وه ،دا هم عجیبه ده چي د تغلب له لاري د حکومت قایمېدل د دوی د مذهبي اعتقاد پر اساس باید شرعي حیثیت ولري او واکمن ته ئې د مطلق العنان اختیارات او تصرفات ورکړی شي ، آیا د تغلب له لاري را منځ ته شوی حکومت به تر جوړېده وروسته د خپلو قضایا وو او اوامرو په صادرولو کي؛د ملي شتمنیو په تصرف کي؛د خپلو اختیاراتو او فوځي قوت څخه په استفادې د قوانینو تصویب په داسي ډول کوي چي د خپل حکومت بقاء ئې پرې تضمین شي،د تغلب له لاري را منځ ته شوی حکومت پخپلو فیصلو او تصرفاتو کي خپلواک وي که د اسلامي شریعت تابع او منقاد ،دا هم باید جواب شي چي طالبان څنکه پر کابل مسلط شول،د غرب په وړاندي واکمن نظام خپل حساسیت ولي له لاسه ورکړی دئ،کابل ته له راتګ وړاندي طالبانو او امریکایانو کومه توافق نامه د نړۍ والو په وړاندي ایښې او کومي کړۍ ئې مرموزي پاته دي؟!

حزب اسلامي د کابل منحطي ادارې په وړاندي نه وسله په ځمکه ایښې او نه ئې کوم مجاهد سنګر تخلیه کړی وو؛هر هغه څوک چي د دې خلاف شواهد او اسناد وړاندي کولای شي نو میدان ته دي را وړاندي شي؛تسلیمېدل او وسله په ځمکه ایښودل یو خاص مفهوم افاده کوي چي په معنا ئې هر عاقل او هوښیار انسان پوهیږي،حزب اسلامي د کابل له ادارې سره خاصه معاهده کړې؛داسي معاهده چي پر خاصو اوصولو او ضوابطو قایمه وه،پر پنځه ویشتو ماده مشتمله وه ،ددې معاهدې بند بند خوندي دئ او هر څوک ئې لوستلای شي؛د علماء وو درنې او معتبرې شوری ته دي وړاندي شي چي کوم څه پکښي د عقل او اسلامي اصولو خلاف وموندل شول حزب اسلامي تیار دئ چي جبران به ئې کوي او هره پړه به په ورین تندي مني؛مګر که خبره د دې خلاف وه نو دا د مړې ګیډي قضاوتګر څوک دي چي له جیبه چاپ شوي فتواوي صادروي، دا هم باید په نظر کي ونیول شي چي د یو دومره ستر حزب په خلاف پوچه خوله پرانستل او یو شرعي کار ته د حرام په سترګه کتل او په خلاف ئې فتوا صادرول به د اسلام له نظره څنګه وي،آیا دا بدمسته واعظین بیا دې ته تیار دي که ئې چیري خپله ادعاء ثابته نه کړه نو د اسلامي اصولو سره سم به مجازاتو ته غاړه ږدي او حد به پر جاري کیږي،که د دوی له نظره دا صلحه او او معاهده ناروا وي نو د پیغمبر ع د حدیبې صلحي ته په کوم نظر ګوري، آیا د هغې په رڼا کي د ځان لپاره کوم سنت او تګلاره ټاکي او که هسي ئې د تاریخ تېر باب شمېرلی؛آیا کله ئې هم ددې صلحي بندونه تر نظر تېر شوي؛د جلیل القدره صحابه وو ددې صلحي په اړه څه عکس العمل وو او قرآن د دوی د دې عکس العمل په وړاندي کوم حکم صادر کړ.

دا هم باید واضح شي چي د حزب اسلامي دا معاهده د تړلو دروازو تر شاه پټه معامله نه وه بلکي د هیواد په داخل کي  اولس او د حزب هر رکن ئې له بند بند او حرف حرف واقف وو چي دا د هغو پر مخ کلکه څپېړه ده چي د هیواد نه بهر او د تړلو دروازو تر شاه ئې معاملې کړي وې او بیا هیواد ته د پردو په مټ او زور را ستانه شول.

که د حزب اسلامي صلحه ناروا عمل وو نو طالبان باید دا هم جواب کړي چي د بندیانو په فهرست کي ئې ولي حزب اسلامي ته د خپلو اسیرانو نومونه ورکړل،په کوم دلیل او منطق ئې له حزب اسلامي څخه دا طمعه ساتله،په ناروا کي د روا لټون د شریعت له نګاه څخه څه اعتبار لري؟

د حکمتیار راتګ کابل ته په ټولو مؤمنو او خدای پالو افغانانو کي یوه نوې ایماني ولوله او جذبه را پیدا کړه؛هر هغه څوک چي د هغو صحنو شاهد پاته شوی وي د همدې خبري شهادت او ګواهي به ورکوي،حکمتیار له خپل راتګ سره سم د غربي ښکېلاک په خلاف یو بل تود او ستر سنګر پرانستو،کوم چي د ایمان په کتاب کي او د انبیاوو په تاریخ کي ورته دعوت ویل کیږي،هر نبی او رسول مکلف وو چي د کفر او نفاق د جبهو په خلاف به خپل دا سنګر تود ساتي او مؤمن امتیان به ئې د دعوت په لمنه کي خوندي او د ایمان په نور منور پاته کیږي،پرته له کوم تفکیک او تبعیض نه،تعجب دئ چي ځیني احمقان د دعوت له ستري وجیبې دومره نا آشنا دي چي ضرورت ئې منتفي ګڼي او پدې نه پوهیږي چي د اسلامي امت د زوال او انحطاط ستره او اساسي نقطه څه وه؛د امت سترو سترو جلیل القدرو علماء وو خپل ژوند د څه لپاره وقف کړی وو؛دا چي موږ نن په پراخه سینه او شخو بریتو د اسلام دعوه کوو دا د چا له برکته دي؟!دا نن چي زموږ هیواد دا څو لسیزي کیږي چي د اور په لمنه کي سوځي آیا تاسو ئې کله هم اصلي او بنیادي علت ته پام کړی؟!

که د حکمتیار راتګ کابل ته د کفر او تسلیم په معنا نیسئ نو ماته جواب راکړئ:د ابرایم،نوح،یوسف،ذکریا،موسی،عیسی او نورو انبیاءع وو مبارزې ته په کومه سترګه ګورئ؟؟حکمتیار هم سنګر پاللی او هم محضر،هم ئې جهاد کړی او هم ئې دعوت کړی او  دا د اوللعزمه پیغمبرانو سنت دئ.

بیا هم تعجب او تأسف ددې خوارانو پر حال چي لا تر اوسه پدې نظر دي چي د دین ارشاد او خپرېدل د هغو حاکمانو او امراوو له لوري شوی چي د ځان لپاره به ئې په حرم سرای کي په سونو سونو مینځي ساتلې او د اقتدار لپاره به ئې د تغلب په شرعي فتوا هر ناوړه او سپک کار دځان لپاره جایز او روا ګڼلو، که دا د مؤمن مسلمان قتل وو د امام ابو حنیفه په څېر او که په بیت المال کي د خپلو ناروا او مردودو خواهشاتو لپاره تصرف وو.

حکمتیار د دعوت او ایمان په تجدید کي هومره کار کړی چي د هیواد په ټول تاریخ کي ئې نظیر نه لیدل کیږي،له هغه ورځي نیولې چي د افغانستان خښته ایښودل شوې بیا تر نن پوري هیڅ مصنف د حکمتیار له شاهکارو تصنیفاتو سره بېلګه نشي جوړېدای،که دا له آدبي پلوه وي او که له معنوي او یا دیني اړخه وي،ځوان نسل ته چي د غربي استعمار له فلسفې متأثر وو نن حکمتیار د سپر او ډال حیثیت لري،امارت اسلامي او په واک کي ئې ټول نظامي او رسنیز وسایل دي د حکمتیار د یوې وړې رسالې په شکل تقدم شعور بر ماده ځوان نسل ته وړاندي کړي موږ به ئې و منو،ډاروین او د تدریجي ارتقاء غلطه نظریه چي ډېره وړه رساله ده؛له چړي مو نیولې بیا تر شېخه تاسو او خدای چي ددې عنوان په ماهیت پوهیږئ؟!

بایبل د قرآن په رڼا کي په پښتو او دري د غربي استعمار پر مذهبي کلیسا د بطلان کرښه ده،ټول غرب ستاسو د  حمایت سره دي دا کتاب تنقید کړي، غربي فیلسوف زیګمونډ فروید ته همدې د ایمان داعي د خوبونو له لړۍ جواب ورکړی،يو ځل بیا وایم له چړي تر شېخه مو تاسو او خدای په نوم ئې خبر یاست، له فلسفې سره ئې واقف یاست،آیا پدې خبر یاست چي کارل مارکس ،ډاروین او فروید د امت ځوان نسل ته د کومو زهرو او زقومو حیثیت لري،آيا خبر یاست چي کمیونیزم خپل تور وزر څنګه د هیواد په انګړ کي وغوړاوو،آیا خبر یاست د کمیونستی ښکېلاک او شرقي سېلاب په خلاف لمړنی کتاب چا لیکلی،ستاسو د معلوماتو لپاره باید ووایم:دا نه کوم مولانا لیکلی او نه کوم شېخ،بلکي هغه مهال دا ټول د شاه دربار ته په طمعه ناست وه بلکي د هغه لپاره ئې د دائم العمره خطبې ویلې،دا د نهضت تنکي تنکي ګلونه وه چي یوولس ئې په شهادت ورسېدل او یو حکمتیار ترې پاته دئ چي ستاسو او د ټول شرق او غرب خوبونه ئې حرام کړل.

د امت هغه ستر ناسور (شیعه )چي تل ئې اسلامي امت په غم ځنګولی؛ آیا تاسو ئې په خلاف کومه فکري مبارزه کړې؟کوم کتاب لرئ چي د هیواد ځوان نسل ته ئې په لاس کي ور کړئ، دا اوس چي غرب او په رأس کي ئې امریکا پخپل ټول توان او طاقت سره دا کوښښ کوي چي د اسلامي امت د چارو واګي دوی ته په لاس کي ورکړي او عملاً ئې دا کار په عربي نړۍ کي تر سره کړی