د کندهار نړيوال هوايي ډګر پرانيستل، ۱۹۶۰ع

زموږ د ملي هويت د ودانيو څخه يوه د کندهار د هوايي ډګر وداني ده چي د معمارۍ په خورا عصري هنر د امريکايي مهندسينو لخواد ١٩٦٠ع کلونو په لومړيو کي د ١٥ ميليون ډالرو په لگښت جوړه سوه.

په لوړو تاقونو سره د کندهار هوايي ډگر جوړولو موخه د کراچي او ډيلي هوايي ډگرونو د يوه سيال رامنځته کول وه چي د اروپا او ختيځي آسيا ترمنځ تلونکي راتلونکي الوتکي پکښي لنډمهالي ناستي وکړې.

پخوانی پاچا محمد ظاهر شاه وتوانېد چي له روسانو او امريکايانو څخه په يوه وخت د افغانستان په ګټه کار واخلي چي له همدې امله د دغه هوايي ډگر د جوړولو کار امريکايي کمپنۍ موريسن کنوډسن شرکت ته وسپارل سو.

ټاکل سوې وه هلته يو مېلمستون جوړ سي چي ١٠٠ خوني به ولري او د بېلگي په توگه هغه سپرلۍ چي له روم څخه سنگاپور ته پر لار وي؛ وکولاى سي په مېلمستون کي شپه تېره کړي.

همدارنګه تر مځکي لاندي د تيلو ٦ يا ٨ ټانکونه جوړ سوي وو چي د برېښنا په مټ کنټرولېدل او د هوايي ډگر له بهرنۍ برخي سره تړلي ول.

کولاى مو سول، په الوتکه کي دننه کښېنۍ او د يوې توکمې په کښېکاږلو سره د خپلي خوښي تيل الوتکي ته واچوئ.

د کندهار هوايي ډګر کي تر ټولو ډېر زيار د هوايي دګر آمر ارواښاد عزیز احمد اعتمادي او عبدالکریم حکیمي [د ملکي الوتنو ريس] وکښل. عکسونه يې البوم کي...

د ثور د خونړۍ کودتا پر وخت د كندهار د ملكي هوايي ميدان د آمريت پرسونل تقريباً ۱۲۰۰ نفرو ته رسېدى، خو د کودتاچیانو لټ وخرېز او د مخالفو ځواكونو له خوا د راكټونو د توغوني له امله په هوايي ډګر کي ملكي الوتني په ټپه ودرېدې.

د تاليبانو د اولي دورې پر مهال يوازي اماراتو او هندوستان ته ملكي الوتني کېدې خو هوايي ډګر د جنګيالو او نظاميانو کرارګاه وه چي چنداني د نظم او خدمت چاري نه وې.

د سپتېمبر د ۱۱ نيټي تر پېښي وروسته دكندهار هوايي ميدان د جگړې په مركز بدل سو چي د جگړو په اثر د هوايي ډگر عمارتونه تخريب او د هوانوردۍ ټول تاسيسات له منځه ولاړل، د امريکايانو په ځانګړې پاملرنه د هوايي ډګر ټولي زړې الوتکي او وسايل د […] له لوري په لاريو کي پاکستان ته د کباړ په شکل ولاړل او مالومه نه سوه چي چا، چيري او په څه رانيول.

لنډه دا چي کندهار هوايي په روانو دريو لسيزو کي د دسيسو، ظلمونو او ګډوډيو له امله په بدن کي وينه وچه سوه او د لس زره جريبه مځکي څخه ئې يوازي سل جريبه مځکه د افغانانو په لاس کي وه.

لا هم ددې هوايي ډګر راتلونکي نظامي ښکاري او د بده مرغه دې ورستيو کي د کندهار نظامي ځواکونو هم د هوايي ډګر سره ومښلول سوه.

د کندهار د اوسني هوايي ډګر تر مخه د اوسنۍ بولدک اډې پر ځای هوايي ډګر وو چي د امير_امان_الله خان په دوره کي ئې چاري بشپړي سوې.