او ماليده چې روسان چا واېستل ؟!
عبد المالک بیکسیار
او روسان چا واېستل ؟
روسان نيم تلې څپلۍ ،
روسان شليدلي ګريوان ،
روسان په خړ خيرن واسكټ دپاسه،
دسرې، زړې خمتا درې كونجه پيوند،
روسان د كلي دماشوم ليندۍ
زموږ ه له كلا واېستل،
او ماليده چې روسان چا واېستل ،
روسان نهرو ويالو ،
روسان ګونګي مازديګر ،
روسان نالوستي ګودر ،
روسان په پورې غونډۍ خښ
شهيد غاټول واېستل ،
روسان له دوړو ډك پكول واېستل ،
ټولې نړۍ ورته كاته چې روسان ډلې ډلې ،
او وارخطا وارخطا،
له څرخي پله نه راوچتې شور غوغا واېستل ،
او ماليده چې روسان چا واېستل ؟!!
روسان د ميندو ښېرو ،
روسان دخويندو ساندو،
روسان پښې يبلې يتيم ،
روسان له ژونده ناخبره سرګردان كوچي ،
روسان ددې خاورې په وينو تاريخ ،
روسان ددې خلكو بې كچې سپېڅلتيا واېستل ،
او ماليده چې روسان چا واېستل ؟!!
روسان واخان كې د وزلوبې د اسونو دربا،
روسان ګومل كې زنګ وهلي پنځه ډزي ټوپك ،
روسان زموږ دتشو مېنو وهم ،
روسان زموږ ه د وچتو غرو بې ژبو تيارو ،
روسان ددې وطن زيږي غوندې هوا واېستل ،
او ماليده چې روسان چا واېستل ؟!
نه يې ځان روڼ آندى باله ،
او نه ملا اېسېده ،
دوطن د مور ريښتينى بچى ،
د آزادۍ مجاهد ،
چې يې دا سره ديوان له پولې د دنيا واېستل ،
او ماليده چې روسان چا واېستل .
.............................................................................................
د وياړلي ولس د وياړ ورځ
هر يرغلگر ته د عبرت درس
او پاتې شونو ( كمونستانو ) ته يې تلپاتې تاريخي پيغور
( د دلوې ۲۶ له گران هيواده د سرو شورويانو د شرميدلې تيښتې ورځ )
تبصره / نظر
نظرات / تبصري
د همدې برخي څخه
شریک کړئ
زمونږ فيسبوک
